mardi, janvier 10, 2017

حمام الميمة زمان 😊


فاش كنا صغار كنكرهو شي حاجة سميتها الحمام علاش ؟؟

حيت الميمات الله يرحمهم واللي عايشة يطول فعمرهوم كانو كايعذبونا تعذيب ملي يكونو كايدوشو لينا ..

ربي اللي عالم بيا ملي تقول ليا نوضي الحمام كنتصرع من الخلعة ...وكانقلب غي فين نتخبا..

كتبدا رحلة التعذيب من تحياد الحوايج...

تحيد لي التريكو تكول كاتريش الدجاج... و وذنيا كلا وحدة فيهم فجيهة ...

الوقت كامل تاع التدواش خاصك تكون گالس قرفصاء ..
ولكن الحاجة راه ضروني رجليا والله...

وكتجيني واحد التسرفيقة من حيث لا أدري ... سوووكتيي

أما بالنسبة للما خاصو ضروري ولابدا يكون تحت درجة الغليان ...

الحاجة آ الحاجة راه سلقتيني طيبتيني ..

وهاهيا التسرفيقة الثانية قلبت عليها ...

و ملي تكون كاتحك ليا وجهي قسما بالله تگول كاتحك المصباح تاع علاء الدين  باش يخرج داك الجني اللي فيه ..
وراسي كايضور من الليمن لليسر تگول الصفارة تاع الكوكوط ..
والمشكلة مللي ينزل ليا الصابون على عينيا و تكون باغا تحيدو كاتبدل ليا الملامح ديال وجهي كاملين ... وهادشي بلا العينين اللي تايحرقوني ..

ونجيو ملي تشد ليك نيفك وتگوليك دير  نننففففففف..
كاتولي تنفنف من ودنيك حيت گاع المجاري ديال التنفس مسدودة ...

#فقرة الكيس
كتشد الكيس كتفركو فالصابونة و كاتمشي نيشان لظهرك وتما كاتنزل عليك تگول شي جزار كايمضي فالجناوي ديال الدبيح ...

طبعا ربي اللي كايسترنا والله اما راه الحكان ديالها يجيب شلل رباعي ...
واخا غا تهدني شوية يا نبع الحنان راه كانحس بحال لا راك تحكي فالفرماج الحمر ...

وملي تخرج من الحمام وتشوف راسك فالمرايا وتشوف لحمك كيتفور  تگول شي كوكوط عاد تحلات ...

ريوس صباعك كايكونو مكمشين ولونك بين الحمر والبيض من كثرت الحكان ....

أجيو دابا مللي تبغي تلبس ليك الحوايج ..

راسك كايكون كبير ب خمسة تالمرات من الفم تاع التريكو وهيا خاصها دخلو ليك بزز تا تولي تحس بلي راه ودنيك مشاو مع التريكو ...

كاتلبسك الاولى  التريكو الثاني و وياك تم وياك تفلت الكم تاع  التريكو لا گالت ليك شدو باش تلبس اللي بعدها ...

كانجيو لمشيط الشعر ...
حفاظا على سلامة الرأس من القمل والشوائب  كتغرز المشطة فالشعر وتما كايبدا الحرث الطبيعي  وطبعا كاين احتمال أن السنان تاع المشطة يوصلو لمخك ...

------------------------------
حمام نبع الحنان واخا تكون صومالي تولي أبيض فاقع
 
😂😂😂😂
الله ارحم أيام زمان 

😎😎😎
--منقول

Aucun commentaire:

Enregistrer un commentaire

Une erreur est survenue dans ce gadget